RÉGIS RAJEMISA-RAOLISON, MPANORATRA NANDALINA SY NAMPITA NY FOMBA AMAM-PAHENDRENA MALAGASY
RAKOTONDRAVAO Andrianantenaina
Mpanoratra malagasy nisongadina i Régis Rajemisa-Raolison. Nampiavaka azy ny
fanoratana boky fampianarana ny fitsipi-pitenenana malagasy, rakibolana
ary boky momba ny fomba amam-pahendrena malagasy. Hita tamin’ireto asa
sorany farany ireto ny fahaizany mampita izany fahendrena mampiavaka ny
razantsika izany ka tokony hotazonin’ny taranaka ankehitriny. Ny boky
roa nosoratany mba hampianarana ny fomba malagasy ao amin’ny kilasy faha-6
hatramin’ny faha-3, izay tafiditra tao amin’ny fandaharam-pianarana tamin’ny
Repoblika voalohany sy faharoa, dia ahitana taratra izany fahaiza-manao izany.
Ny tanjona amin’ity asakaroka ity dia ny fanasongadinana ny fomba fiasa sy
fampitan’ny mpanoratra fahalalàna amin’ny mpianatra malagasy. Nofakafakaina sy
nohalalinina ary naravona ireo lesona nampitaina isa-kilasy mba hahafahana mahita
ny hevitra navoitran’ny mpanoratra. Tena nahaliana ny fomba nampitany izany
ao amin’ireto boky ireto:
- " Fomba amam-pahendrena malagasy. Kilasy faha-6 sy faha-5 "
- " Fomba amam-pahendrena malagasy. Kilasy faha-4 sy faha-3 "
Tenizaha:Rajemisa-Raolison, boky fampianarana, malagasy, fomba amam-pahendrena
07/12/2023