Fahatsiarovana sy fankasitrahana an’Atoa Dr ANDRIANTSOA Andriamanalinirina Jean Rubis
16 Janoary 1944 – 26 Janoary 2025
Mpikambana mahefa - Mpirakitra maharitry ny Sokajy Hairaha AmpiharinaAkademia Malagasy (1980 – 2025)
Mpikambana Comité Malgache d’Ethique pour les Sciences et Technologies – CMEST (2007 – 2025)
Lahateny nataon-dRtoa Profesora RABENORO Irène,
Filohan’ny Akademia Malagasy
Fivoriambe iombonana – Alakamisy 17 Jolay 2025
Lapan’ny Akademia Malagasy, Tsimbazaza
Tompokolahy sy Tompokovavy,
Sanatria tsy hamoha fota-mandry raha mandray izao anjara fitenenana izao manoloana
anareo Fianakaviana, folak’andry niankinana sy ianareo Mpiray asa, Mpiray Fikambanana, very
kiady, nilaozan-tsakaiza. Fa izao no fotoana nalahatry ny Akademia Malagasy, nifanarahana
tamin’ny Fianakaviana, ary iarahana amin’ny Académie Nationale de Médecine de Madagascar
(ANAMEM) hanolorana eto anivon’ity Andrim-panjakana ity ny fankasitrahana, sy
hahatsiarovantsika miaraka an’i Dr Andriantsoa Jean Rubis, Mpikambana mahefa teto anivony,
nodimandry ny 26 Janoary lasa teo.
Volana maromaro tokoa izao no nandaozany ny Akademia Malagasy, nefa dia
fahabangana mbola saro-bahana no setrin’izany, satria nanana ny toerany teto amin’ny
Akademia izany lehilahy izany, ary isan’ny nitondra avo ny asa fikarohana teto anivony. Koa
heveriko fa rariny sy hitsiny ny hankasitrahana sy hanolorana fanajana azy noho ireo asa
makadiry sy zavabitany, izay tsy ho àry voatanisa eto avokoa fa amin’ny ampahany ihany, noho
ny fotoana voafetra.
Tompokolahy sy Tompokovavy,
Teraka ny 16 Janoary 1944 tao Fianarantsoa ANDRIANTSOA Andriamanalinirina Jean
Rubis. Nanambady an-dRtoa Profesora Rasoavelonoro Violette izy, ary mianadahy ny zanak’izy
ireo. Teto Antananarivo, teo amin’ny faha - 81 taonany no nodimandry izy, ny 26 Janoary 2025.
Tao amin’ny École Confessionnelle Luthérienne Mangarivotra, Fianarantsoa izy no
nanomboka nianatra ny taona 1949, ary dimy taona taorian’izany dia nifindra teto Antananarivo,
namarana ny ambaratonga voalohany tao amin’ny Ecole Privée Union Chrétienne. Teo amin’ny
ambaratonga faharoa kosa dia teny amin’ny Lycée Jean Joseph Rabearivelo no nanohy ny
fianarany izy, izay nahazoany ny Baccalauréat série Sciences expérimentales, ny taona 1963.
Fianarana ho Mpitsabo sy fandalinana Fizika no lalam-pianarana nofidiny teo amin’ny
ambaratonga ambony. Tao amin’ny Faculté des Sciences, Oniversiten’i Madagasikara, izy no
nisantatra izany tamin’ny fianarana fanomanana hidirana ho mpianatra ho mpitsabo, ary nahazo
ny Certificat d’études préparatoires aux études médicales ny taona 1964.
Ny taona 1965, dia nihazo an’i Frantsa ny tovolahy hanohy ny fianarana ho mpitsabo
tany amin’ny Faculté mixte de Médecine et de Pharmacie de Marseille, sy nanjohy ny
fandalinana Fizika tao amin’ny Faculté des Sciences de St Charles, Marseille. Ary ny taona
1972 no nahazo ny maripahaizana Doctorat en Médecine – diplôme d’Etat izy, ka ny
lohahevitry ny theziny dia ny hoe « Intérêt de la Scintigraphie hépatique dans le diagnostic des
abcès du foie ». Ankoatra io maripahaizana io moa dia nahazo ihany koa ny Certificat d’études
spéciales de Médecine Nucléaire izy ny taona 1975, tao amin’ny Institut National des Sciences et
Techniques Nucléaires tao Saclay, tao Frantsa ihany.
Tompokolahy sy Tompokovavy,
Teo amin’ny lafiny asa dia sehatra roa lehibe no nifantohany : asa fitsaboana sy asa
fampianarana. Nanana andraikitra ambony ihany koa anefa izy nifanila tamin’ireo sehatra ireo,
teo amin’ny asam-panjakana.
Nanomboka ny taona 1969 no efa nisahanany ny asa fitsaboana. Mbola “Externe des
hôpitaux” tao Marseille (Service central des radioisotopes) izy tamin’izany. Ary niandraikitra
asa fitsaboana ny zaza (Pédiatrie) tao amin’ny Sampan-draharaha notarihin’i Pr Denis
Rakotoarimanana, teny amin’ny Hôpital Général de Befelatanana izy, rehefa niverina teto an-
tanindrazana ny taona 1976.
Tany Marseille ihany koa izy no nisantatra ny asa fampianarana tamin’ny asa tantsoroka
ireo mpianatr’asa teny amin’ny hopitaly (Service des radioisotopes de Marseille sy Service de
Médecine nucléaire du CHR de Nîmes) ny taona 1973. Ary teny amin’ny École d’enseignement
médico-sociale, teto Antananarivo no nandraisany asa fampianarana voalohany teto an-
tanindrazana, nanomboka ny taona 1977.
Maro ireo ivotoerana nampianarany, izay tsy àry ho voatanisa eto daholo. Singanina
amin’izany ny Institut National des Sciences et Techniques Nucléaires - INSTN Madagascar sy
ny Faculté de Médecine - Oniversiten’Antananarivo, izay nitarihany asakaroka « thèses de
doctorat » maro, hatry ny taona 1977. Fampianarana pratiques kosa no tena nimasoany tao
amin’ny Laboratoire des radioisotopes, ary efa Tale teo anivon’izany Laboratoara izany ny
tenany.
Tsy adino ny naha Mpikambana tao amin’ny Filankevitra siantifika azy teo anivon’ny
Oniversiten’Antananarivo (1992) sy ny Oniversiten’i Fianarantsoa (1993). Marihina fa ny
Oniversiten’i Fianarantsoa moa no nandravaka azy ny laharana Docteur Honoris Causa ny
Sabotsy talohan’ny nahalasanany.
Taty aoriana dia nisandrahaka teny amin’ny Oniversiten’i Toamasina sy Toliara ny asa
fampianarana nataony, ary nampianatra sy niandraikitra ny Sampam-pianarana momba ny
« Fahasalamana » teny amin’ny Oniversite ACEEM koa ny tenany.
Araka ny efa voalaza tany aloha, dia nanana andraikitra ambony ihany koa izany
Akademisiana izany teo amin’ny sehatry ny asam-panjakana, izay naha Sekretera Jeneralin’ny
Ministeran’ny Fahasalamana azy ny taona 1992 hatramin’ny 1994. Mpikambana tao amin’ny
Kabinetran’ny Minisitry ny Fahasalamana kosa izy ny taona 1994 hatramin’ny 1996, ary tao
amin’ny Kabinetran’ny Minisitry ny Fahasalamana sy ny Fandrindram-piterahana ny taona 2002
hatramin’ny 2004.
Tompokolahy sy Tompokovavy,
Noraisina ho Mpifandray tato amin’ny Akademia Malagasy i Dr Jean Andriantsoa ny
taona 1980 tao amin’ny Sokajy Hairaha Ampiharina. Nasondrotra ho Mpikambana
mpiombonantoka izy ny taona 1987, ary nasandratra ho Mpikambana mahefa ny taona 1988.
Nisahana ny andraikitra naha Mpirakitra maharitry ny Sokajy Hairaha Ampiharina izy hatry ny
taona 1988.
Tamin’ny taona 1979 no nanomboka nanolotra ny vokapikarohany teto amin’ny
Akademia Malagasy izy, ary amin’ny ankapobeny dia asakaroka momba ny fitsaboana
mampiasa fitiliana ara-teknolojia nokleary, na fampiasana imagerie médicale ahafahana
manombana ny aretina sy ny mety ho velarany no niompanany. Tsikaritra tamin’ireo
vokapikarohany ireo fa tsy mba nataony ambanin-javatra ny fanaovana an-tsoratra izany.
Fantatra rahateo teto amin’ny Akademia Malagasy fa tena sarotiny tokoa izy teo amin’ny
lentan’ny lahatsoratra sy ny velakevitra nentin’ireo mpikaroka nanao fanolorana.
Tompokolahy sy Tompokovavy,
Ankoatra ny naha Mpirakitra maharitra azy teo anivon’ny Sokajy Hairaha Ampiharina,
izay andraikitra tontosany an-tsakany sy an-davany sy nikelezany aina tokoa, dia Mpikambana
navitrika koa izy tao amin’ny Comité Malgache d’Éthique pour les Sciences et Technologies
(CMEST), izay Rantsamangaikan’ny Akademia Malagasy misahana ny fanaraha-maso ny ethika
eo amin’ny asa fikarohana. Nifanentana tsara tamin’ny toetra sy fisainan’i Dr Jean Andriantsoa
izany tandrohasina izany.
Tsy nisy Mpikambana na Mpifandray na Mpandraharaha iray nifanerasera taminy,
angamba ka tsy hahatsiaro ny fanitsiana mivantana nataony, miharo sangisangy zary tenany, ary
tena mipaka lalina any an-tsaina tokoa rehefa misy ny tsy mety ka nahitsiny. Tsy nijery arina an-
tava izy, ary nanana fijery sy fomba fiasa mametraka ny tokony ho izy araka ny tena izy, sy
mikatsaka ny fahamendrehana hatrany. Fiteniny matetika moa ny hoe “Hoy i Président
Rabenoro” ary dia tena zandriny tokoa izy, nanahaka azy, hoy ny zanak’ilay Président Rabenoro.
Filoha na Mpikambana tamina Vondrona Mpikaroka
maro izy : Filohan’ny Société
d’Imagerie Médicale de Madagascar, Filohan’ny Comité d’Éthique de la Recherche
Biomédicale de Madagascar, Mpikambana tao amin’ny Société des Sciences Médicales de
Madagascar, Mpikambana tao amin’ny Société Malgache de Pédiatrie et de Puériculture. Izy no
anisan’ny angady nananana ny Groupe Technique Consultatif sur la Vaccination (GTCV)
Madagascar. Teo anivon’ny Académie Nationale de Médecine de Madagascar (ANAMEM) kosa
dia Mpirakitra maharitra tena naharitra tokoa izy, ary manana anjara fitenenana eto anio ny
Filohan’izany Fikambanana izany.
Tompokolahy sy Tompokovavy,
Tsy fahaizana amam-pahalalana fotsiny no nahafantaran’ny maro an’i Dr Jean
Andriantsoa, fa lehilahy mandray andraikitra na teo amin’ny sehatry ny asa na teo amin’ny
sehatry ny Fiangonana. Nitondra ny anjara birikiny teo anivon’ny Fiombonan’ny Fiangonana
Kristiana eto Madagasikara (F.F.K.M) izy ary koa tao amin’ny Fiombonan’ny Fiangonana
Protestanta Malagasy (F.F.P.M). Mpitendry zava-maneno (orgue) nanana ny naha izy azy tao
amin’ny FLM Ambatovinaky koa izy.
Na teo amin’ny lafiny ara-panatanjahan-tena
aza dia efa nitantana ny Club des Arts
Martiaux III FB – Clam nandritra ny 26 taona (1980 - 2006) izy teo anivon’ny Ministeran’ny
Fahasalamana.
Farany, izay tsy ny kely indrindra akory, dia lehilahy nijoro sy niady ho an’ny
tanindrazana i Dr Andriantsoa Jean Rubis, satria tahaka ny nahasarotiny azy teo amin’ny
lentan’ny asa fikarohana ihany koa no tsy nandeferany manoloana ny fiandrianam-pirenena.
Nametraka ny fijery politikany izy raha nitsangana ho Filohan’ny Forum National pour
l’avènement de la IIIè République de Madagascar ny taona 1991, ary mbola izy no Filohan’ny
Commission d’enquête sur les “événements du 10 Août 1991” izay niorina ny taona 1992.
Noravahan’ny Fanjakana malagasy ny
mariboninahi-pirenena Grand Croix de deuxième
classe de l’Ordre National Malgache ny tenany ny taona 2017, noho ireo ezaka goavana nentiny
nanatanteraka ny anjara adidy sy andraikiny teto amin’ny Firenena.
Tompokolahy sy Tompokovavy,
Ankehitriny dia miangavy an’i Pr Ange
ANDRIANARISOA, Filohan’ny Académie
Nationale de Médecine de Madagascar (ANAMEM) aho hitondra ny anjara lahateniny. Marihina
fa eto amin’ny Akademia Malagasy no misy ny Biraon’ny ANAMEM, sy toerana fivorian’izy
ireo.
Omena anao ny teny, Profesora.
Lahatenin’i Pr Ange ANDRIANARISOA, Filohan’ny ANAMEM.
Tompokolahy sy Tompokovavy,
Lavo ny andrarezina, ary tsy ny Akademia Malagasy na ny Académie Nationale de Médecine de Madagascar ihany no very olomanga raha nilaozan’i Dr Jean Andriantsoa, fa ireo ivotoerana rehetra niasany sy nampianarany, ary ny Firenena malagasy manontolo. Ny Akademisiana anefa tsy mba maty, noho ny fahendrena nasehony sy ireo asa makadiry sy vokapikarohana navelany ho lovan-tsaina ho an’ny taranaka fara mandimby.
Koa ho fahatsiarovana azy sy ho fiombonantsika fo hanaja sy hankasitraka azy, dia miangavy antsika hiara-hitsangana anaty fahanginana iray minitra.
Mankasitraka Tompokolahy, mankatelina Tompokovavy.