Fahatsiarovana sy fankasitrahana an’Atoa Profesora RODIN Serge Henri
6 Aogositra 1949 – 18 Septambra 2024
Mpikambana mahefa - Mpirakitra maharitry ny Sokajy Haikanto sy Hailaza Akademia Malagasy (1993 – 2024)
Filoha p.i. teo aloha an’ny Comité Malgache d’Ethique pour les Sciences et Technologies – CMEST (2020 – 2021)
Lahateny nataon-dRtoa Profesora RABENORO Irène,
Filohan’ny Akademia Malagasy, tao anatin’ny Fivoriambe iombonana fanokafana ny
taom-piasana 2024-2025
Alakamisy 24 Oktobra 2024 – Lapan’ny Akademia Malagasy, Tsimbazaza
Andriamatoa isany, Filoham-boninahitry ny Akademia Malagasy,
Andriamatoa Sekretera Jeneralin’ny Fiadidiana ny Repoblikan’i Madagasikara, misolo tena an’Andriamatoa Filohan’ny Repoblika
Andriamatoa Sekretera Jeneralin’ny Governemanta, misolo tena an’Andriamatoa Praiminisitra, Lehiben’ny Governemanta,
Ianareo olo-manan-kaja nasaina araka ny laharam-boninahitra misy anareo avy,
Andriamatoa sy Ramatoa isany Mpikambana ao amin’ny Biraon’ny Akademia Malagasy,
Andriamatoa sy Ramatoa isany Mpikambana sy Mpifandray amin’ny Akademia Malagasy,
Tompokolahy sy Tompokovavy,
Ao anatin’ny fotoana toy izao, izay heverina hiravoana sy hifampirariana soa noho ny taom-piasana vao miandoha sy ny fahasoavana rehetra tiana hifandraika amin’izany, dia tsy mandry ny fisainana ary tsy manaiky ny eritreritra raha toa ka misy adidy tsy tanteraka ka toa manaloka ihany izany fiandrandrana fifaliana izany.
Koa sanatria tsy hamoha fota-mandry raha manokana izao fotoana izao isika hahatsiarovana sy hankasitrahana ny havantsika, namantsika, mpiray fikambanana amintsika izay nandao antsika tsy ela, dia ny Profesora Serge Henri Rodin, Mpikambana mahefa, Mpirakitra maharitry ny Sokajy Haikanto sy Hailaza, nodimandry ny 18 septambra lasa teo. Ny fahavoriantsika marobe anio dia hanatanterahantsika izany adidintsika izany.
Tompokolahy sy Tompokovavy,
Teraka tamin’ny 06 Aogositra 1949 tetsy Ambatovinaky, Antananarivo i Serge Henri Rodin, nanambady an-dRtoa Anna Ravelomanantsoa Ratsimihah izy ary manan-janaka telo. Nodimandry teto Antananarivo izy ny 18 septambra 2024.
Teny amin’ny Oniversiten’Antananarivo no nanjohy ny fianarana ambaratonga ambony izy. Nisafidy ny handalina ny literatiora izy tamin’izany, ary ny taona 1983 no nahazo ny Maîtrise de littérature. Nitohy tamin’ny fahazoana ny Diplôme d’Etudes Approfondies (DEA) de littératures, nifantenany ny lohahevitra « Sémiotique de la parole » ny fianarana norantoviny izay nataony kosa tany Frantsa, tao amin’ny Université Montpellier III.
Nitozo hatrany izy ka nahazo ny maripahaizana Doctorat en lettres et sciences humaines – havanana amin’ny sciences du langage, ny taona 2012, ary ny taona 2019 no nahazo ny Habilitation à Diriger des Recherches (HDR) – Epistémologie des sciences de la culture samy teny amin’ny Oniversiten’Antananarivo.
Teo amin’ny lafiny asa dia fantatra teo amin’ny sehatry ny fampianarana sy ny fikarohana izy, nefa koa nanana ny naha-izy azy ary nisandrahaka tamin’ny tontolon’ny kanto, ny sera sy ny asasoratra ary ny asa fanaovan-gazety.
Azo lazaina ho hainy tsara ny nandrindra sy nampifanojo ireo sehatra nanavanana azy ireo, satria raha niatomboka teo amin’ny asa fanaovan-gazety izy tao amin’ny MADAPRESSE (agence nationale d’information) ny taona 1969 dia tonga mpanolotsaina sy mpiantsoroka eo amin’ny lafiny serasera izy tany amin’ny taona 1990 hatramin’ny 1998 ary nampianatra ny taranja sera eo anivon’ny orinasa teny amin’ny INSCAE (ex-CFC).
Nanana andraikitra ambony koa Atoa Serge Henri Rodin teo anivon’ny Ministeran’ny mponina satria izy no Tale Jeneraly nisahana ny fanarenana ara-tsosialy (Directeur général du redressement social) ny taona 1996-1997 ary mpanolotsaina teknika ny taona 1997-1998.
Ankoatra ny fanaovan-gazety, izay notohizany tao amin’ny KORAIL OCEAN INDIEN nanomboka ny taona 1993, dia nifantoka indrindra koa tamin’ny fampianarana sy fikarohana izy. Efa hatry ny taona 1974 no nisahana ny asan’ny mpampianatra mpikaroka tao amin’ny Departemanta momba ny teny frantsay teny amin’ny Fakiolten’ny Teny aman-tsoratra sy ny Siansa maha-olona – Oniversiten’Antananarivo izy.
Mpikambana tao amin’ny Filankevim-pitantanana ny Oniversiten’Antananarivo izy ny taona 1995 hatramin’ny 1998, ary niandraikitra teo amin’ny naha – ‘Vice Doyen’ azy tao amin’io Fakiolte io, ka ny fifandraisana iraisam-pirenena no noraisiny an-tanana tamin’izany. Taty aoriana dia nivelatra ireo asa aman-draharaha nahafantarana azy teo amin’ny Fakiolten’ny Teny aman-tsoratra sy ny Siansa maha-olona sy ireo sehatra nifanila taminy.
Niavaka teo amin’ny kanto koa Atoa Serge Henri Rodin, izay fantatra tamin’ny anarana naha-mpanakanto azy hoe KORB na ADAORODINA. Mpanoratra, mpamoron-kira, mpanadihady momba ny kanto ny tovolahy tamin’izany. « Chef d’orchestre de musique malgache » teo amin’ny tarika Les enfants Noirs, Fivoarana sy Etsifosaine. Namoron-kira izy niangaliana tao anatina horonan-tsary tahaka ny :
- « e mila rano e », mikasika ny tsy fisian’ny rano tany atsimo – RTVM, 1973 ;
- teo amin’ny Lutte contre la pauvreté et nouveau mental / CEDS/MFCAC, 1998 ; sy ny maro hafa.
Fantatra ihany koa izy tamin’ireo sangan’asany teo amin’ny asasoratra : “Chien de soleil” (sombin-tantara -1990), “La rédemption de l’hérésiarque” (tantara -1994), “Caprice-de-la-lune” (tantara ao anaty rakitra “Père-du-petit-garçon” na Renirenin-dRainilita) – taona 1999.
Tompokolahy sy Tompokovavy,
Noraisina ho Mpikambana mpiombonantoka teto amin’ny Akademia Malagasy, tao amin’ny Sokajy Haikanto sy Hailaza, Atoa Serge Henri Rodin ny taona 1993 ary nasandratra ho Mpikambana mahefa ny taona 2000. Mpirakitra maharitra teo anivon’io Sokajy io izy, ary Mpikambana koa tao amin’ny Filankevitry ny Foibe Momba ny Teny an’ny Akademia Malagasy.
Mpikambana navitrika i Prof. Serge Henri Rodin teto amin’ny Akademia Malagasy, ary izy dia anisan’ireo Mpikambana nanorina ny Comité Malgache d’Ethique pour les sciences et technologies, fantantsika amin’ny fanafohezana CMEST. Isan’ireo rantsamangaikan’ny Akademia Malagasy ny CMEST, izay manara-maso sy miandraikitra ny fampiharana ny tandrohasina (éthique) eo amin’ny lafiny siansa sy teknolojia, indrindra ireo mikasika ny maha-olona. Teo amin’ny CMEST dia tsy mpikambana fe mpikambana fotsiny izy fa Filoha Lefitra tamin’izany rantsana izany nanomboka ny taona 2018, Filohan’ny Vaomiera faha-3 : Ny « Ethique » sy ny fitompoana fahalalana ny taona 2019 ary Filoha mpisolo toerana (par intérim) nandritra ny taona 2020-2021.
Nifantoka tamin’ny taranja nanavanana azy ireo voka-pikarohana maro nataony velakevitra teto amin’ny Akademia Malagasy. Nibahana tamin’izany ny literatiora miara-dalana amin’ny kanto, satria na izy manome lanja mpanakanto sy ny kanto niangaliany, na izy manadihady zava-kanto mivantana. Teo ihany koa ny kanto mivoaka an-gazety, ny endriky ny serasera na teo anivon’ny orinasa na teny amin’ny sehatra toy ny oniversite sy ny sisa. Nahafantarana azy koa ny fandraisany an-tanana matetika ny fanomanana ny fandikan-teny, tamin’ireo fivoriana manokan’ny Akademia Malagasy.
Nanamafy ny mpiara-niasa akaiky taminy, Atoa Ranjatohery Harilala, Filoha Lefitry ny Sokajy Haikanto sy Hailaza fa Mpikambana navitrika tamin’ny fanatrehana ny asan’ny Akademia Malagasy i Prof. Serge Henri Rodin, ary nanaja ny fahalalahan’ny rehetra izy, nametraka andraikitra tamin’ny tsirairay tamin’ny zavatra nambarany sy tamin’ny fitondran-tenany, ary vonona hatrany izy tamin’ny zavatra nankinina taminy.
Tompokolahy sy Tompokovavy,
Tsy tambo ho isaina eto ireo asa aman’andraikitra niantsorohan’i Prof. Serge Henri Rodin, fa ny azo amehezana azy dia nilofo izy hampandroso ny Akademia Malagasy sy nanao an-kitsim-po ireo asa aman’andraikiny ireo ho tombontsoan’ny Firenena. Ka azo lazaina fa izany no antony nametrahan’ny Fanjakana malagasy azy eo amin’ny laharam-boninahitra Grand Croix de 2ème classe de l’Ordre national malgache ny taona 2014.
Ho fiombonantsika fo hahatsiaro sy hankasitraka an’i Prof. Serge Henri Rodin, tamin’ireo asa makadiry navelany holovaintsika sy ny taranaka fara-mandimby, dia hiara-hitsangana ao anaty fahanginana iray minitra isika ho fanajana azy.
Misaotra Tompokolahy, mankasitraka Tompokovavy.